இது ஒரு பொன் மாலைப் பொழுது

உன் வட்ட முகத்தை எட்ட நின்று

பார்த்திருக்கும் நிலா

உன் மல்லி வாசத்தை அள்ளிப் போக

காத்திருக்கும் தென்றல்

உன் முகவொளி காணாமல் தன் அகவொளி

மறைக்காத மாலைக் கதிரவன்

உன் அடிப் பாதம் நனைக்கப் பிடிவாதமாய்

கரை வந்து போகும் கடலலை

எனக்காக இல்லை என்றாலும்

இவற்றுக்காக வா

காத்திருக்கிறேன் கடற்கரையில்

என் காதலி நீ வரும் வரையில்

மனிதரே எம் மனிதரே...

லாட்டரிகளில் லட்சங்களைத் தேடும் லக்கி மனிதரே

உங்களின் வாழ்க்கை லட்சியங்களைத் தேடுங்கள்

பந்தயக் குதிரை மீது பணம் கட்டும் விந்தைய மனிதரே

உங்களின் சிந்தனைக் குதிரையைத் தூண்டுங்கள்

சாராய போதையில் சிக்கித் தடுமாறும் சபல மனிதரே

உங்களின் வாழ்க்கைப் பாதையை தடம் மாற்றுங்கள்

மனிதனை ஆளும் தீய பழக்கங்களில் இருந்து விடுபட

எம் மனிதரே விடுதலை முழக்கமிடுங்கள்!!

யாருக்கு தீபாவளி??

புதிதாய் திருமணமான இளம் தம்பதியருக்கு

மாமனார் செலவில் தலை தீபாவளி

மக்களின் பணத்தை திருடும் அதிகாரிக்கு

தினம் தினம் தீபாவளி

தீராமல் வதம் செய்யும் தீவிரவாதிகளுக்கு

௦நினைத்த போதெல்லாம் வெடிகுண்டு தீபாவளி

முப்போகம் விளைந்தால் தான் உழவனுக்கு

உற்சாகம் பொங்கும் தீபாவளி

வயிறு நிறைந்தால் தான் ஏழைகளுக்கு

வாழ்க்கையில் ஒரு முறையாவது தீபாவளி

ஒற்றுமையாய் கூடி வாழ்ந்தால் தான்

ஒவ்வொருவருக்கும் உண்மையான தீபாவளி