இது எங்க சென்னை

உயிரை விட மயிர் முக்கியம் என்று
தலைக் கவசம் அணிய மாட்டோம் 
சற்று சிரமமாய் இருக்குதென்று 
ஸீட் பெல்ட் அணிய மாட்டோம் 

பச்சை விளக்கு வந்து விடும் என்று
நம்பிக்கையில் கடந்து செல்வோம் 
கடவாதவனை கடிந்து கொள்வோம்

ஒரு வழிப் பாதையில்
ஒய்யாரமாய் எதிர்த்து செல்வோம்
ஒழுங்காய் வருபவனை பற்றி ஓரிரு
பொன்மொழி உதிர்த்து செல்வோம்

இரு கார்களுக்கு உள்ள இடைவெளியை
ஒரு பைக்-கால் அளந்து செல்வோம்

வெள்ளியன்று சனியைக் கூட்ட நடுரோட்டில்
முழு பூசணியைப் பிளந்து போடுவோம்

பளிச்சிடும் உச்ச விளக்கொளி போட்டு
பார்வையை பழுது ஆக்குவோம்

காவல்துறை அதிகாரி வாகனப் பத்திரம்
கேட்டால் காந்தி நோட்டு நீட்டுவோம்

வண்டி ஒட்டிக் கொண்டே கைப்பேசியில்
இதோ வந்துகிட்டே இருக்கேன் என்று
சொல்லி போய் சேர்ந்து விடுவோம்!